🇦🇲 Հարցազրույցին հաճախ տրվող հարցեր | Մաս 1

Ինչպես նախորդ հոդվածում խոստացել էինք, այս անգամ կխոսենք հարցազրույցին հաճախ տրվող հարցերի և դրանց գրագետ ու ճիշտ պատասխան տալու մոտեցումների մասին: Կարևոր ենք համարում նշել, որ մեր նպատակը այն չէ, որ վարպետացնենք թեկնածուներին «պատրաստի ու ճիշտ պատասխաններ» տալու մեջ, ինչում կհամոզվեք, եթե շարունակեք կարդալ :) Ակնհայտորեն երկու գաղափար ենք առաջ մղում՝ լինել անկեղծ ու բաց հարցազրույցների ընթացքում և նախապատրաստվել դրանց հնարավորինս մանրամասն:

Ինչպես գիտենք՝ յուրաքանչյուր հարցազրուցավար տարբերվում է՝ ցուցաբերելով իր յուրօրինակ մոտեցումները հարցազրույցին, հետևաբար՝ տարբերվում են նաև հարցազրույցին տրվող հարցերը: Մենք փորձել ենք առանձնացնել ամենատարածված 9 հարցերը։

Հարց 1. Մի փոքր պատմեք Ձեր մասին

Այս հարցին պատասխանելիս պետք չէ տրամադրել անձնական բնույթի տեղեկատվություն: Հակիրճ պատմեք աշխատանքային փորձի մասին՝ ընկերության գործունեություն, ինչ եք արել, ինչու եք փոխել աշխատանքը։ Փորձեք ընդգծել հատկապես այն, ինչն անմիջականորեն կապված է ներկայումս դիտարկվող հաստիքի հետ:

Խորհուրդ ենք տալիս չպատասխանել ներքոնշյալ կերպ, քանի որ այդ դեպքում տպավորություն կստեղծվի, թե Դուք ուղղակի չգիտեք՝ ինչ պատմել Ձեր մասին։

  • «Դե Դուք հարցեր տվեք, ես կպատասխանեմ»
  • «Իսկ ի՞նչ եք ուզում, որ պատմեմ»
  • «Որտեղի՞ց սկսեմ»
  • «Այնքան շատ ասելու բան կա, Ձեզ ի՞նչն է հետաքրքիր»
  • և այլն:

Այս հարցին պատասխանելու մեկ այլ մոտեցում է «ներկա-անցյալ-ապագա» կառուցվածքը։ Մի փոքր խոսեք այն մասին, թե որտեղ եք հիմա՝ Ձեր ներկայիս պաշտոնը, պատասխանատվության շրջանակը և այլն, հետո գնացեք անցյալ ու մի քանի նախադասությամբ պատմեք Ձեր նախորդ փորձի, կրթության մասին: Վերջում ներկայացրեք կարիերայի նպատակները՝ այսինքն ինչ եք ակնկալում հաջորդիվ, միաժամանակ փորձելով ցույց տալ հետաքրքրությունը տվյալ պաշտոնում:

Հարց 2. Ի՞նչ գիտեք մեր ընկերության մասին

Այստեղ հարցազրուցավարին հետաքրքրում է ոչ թե այն, թե կոնկրետ ինչ գիտեք ընկերության մասին, այլ առհասարակ գիտե՞ք թե ոչ, կատարե՞լ եք ուսումնասիրություն: Նախորդ հոդվածում նշել էինք, որ մինչ հարցազրույցի գնալն ընկերությունն ուսումնասիրելը կարևոր է:

Երբ այս հարցը տրվում է, պետք չէ անգիր ասել ընկերության պատմությունը կամ այն ինչ կարդացել եք «Մեր մասին» բաժնում: Ընդհակառակը, համեմեք պատասխանը Ձեր վերաբերմունքում: Օրինակ. «Գիտեմ, որ միջազգային ՏՏ ընկերություն եք, Ֆրանսիայում ևս մասնաճյուղ ունեք: Ինքս ֆրանսախոս եմ ու շատ սիրում եմ այդ լեզուն, ուստի այդ փաստն ինձ հատկապես շատ հետաքրքրեց: Գուցե հնարավորություն ունենամ օգտագործել իմ լեզվական հմտությունները թիմի հետ հաղորդակցվելիս»:

Այսինքն ցույց տվեք, որ ժամանակ եք հատկացրել հարցազրույցին նախապատրաստվելու համար, հետևողական եք եղել նաև պատասխանելու այն հարցին, թե ինչու է տվյալ ընկերությունը Ձեզ համար ցանկալի։

Հարց 3. Ինչո՞ւ եք ուզում աշխատել մեզ մոտ

Այս ու նախորդ հարցերն իմաստային առումով մոտ են իրար: Այստեղ գործատուն ցանկանում է լսել տվյալ ընկերությունում աշխատելու Ձեր մոտիվացիան, ուստի սա ևս մեկ հնարավորություն է խոսել այդ մասին: Առհասարակ, փորձեք մինչ հարցազրույցն իրոք հասկանալ՝ ինչու եք հետաքրքրված տվյալ պաշտոնով:

Պետք չէ պատասխանել հետևյալ կերպ՝

  • «Դե ես աշխատանք եմ փնտրում»
  • «Անկեղծ ասած՝ ինքս էլ չգիտեմ»
  • «Դե հայտարարությունը տեսա, դիմեցի»
  • և այլն:

Խորհուրդ ենք տալիս պատասխանը բաժանել երկու մասի. առաջին մասով պատասխանեք, թե ինչն է Ձեզ գրավում ոլորտում (օրինակ. «Ցանկանում եմ տեղափոխվել ՏՏ ոլորտ, քանի որ այն շատ դինամիկ է ու արագ զարգացող»), երկրորդ մասով նեղացրեք պատասխանը դեպի ընկերությունում աշխատելու մոտիվացիան («…իսկ Դուք առաջատար ՏՏ ընկերություն եք, և Ձեր արտադրանքը լուրջ նշանակություն ունի մարդկանց կյանքի որակի համար. սա ինձ համար բավականին մոտիվացնող է»): Ի դեպ, եթե այս հարցը Ձեզ չի տրվում, այլ տրվում է միայն նախորդը, ապա կարող եք անուղղակիորեն սրան էլ պատասխանել՝ կապելով երկու հարցերն իրար:

Հարց 4. Ինչու՞ պետք է հենց Ձեզ ընտրենք

Սա մի փոքր խորամանկ հարց է: Սովորաբար օգտագործվում է սթրեսային հարցազրույցների ժամանակ կամ այն դեպքում, երբ ինքնաներկայացումը թեկնածուի գնահատման կրիտերիաներից մեկն է (օրինակ՝ սպասարկում, վաճառքներ և այլն): Խորհուրդ ենք տալիս այս հարցից խուճապի չմատնվել, այլ ճիշտ բալանսը պահել համեստության և ինքնավստահության միջև: Պետք չէ պատասխանել հետևյալ կերպ.

  • «Դե ես չեմ սիրում ինձ գովել, դա Դուք պետք է ասեք»
  • «Ես դժվարանում եմ խոսել իմ դրական կողմերի մասին»
  • «Որովհետև ես Հայաստանի ամենալավ կադրն եմ»
  • «Որովհետև ես մյուսներից առավել եմ իմ փորձի բազմազանությամբ»
  • «Որովհետև ես բարի եմ և սիրում եմ աշխարհը»
  • և այլն։

Ցույց տվեք, թե ինչու եք համապատասխան հաստիքին, այսինքն ընդգծեք Ձեր այն հատկանիշներն ու որակները, որ ներառված են աշխատանքային հայտարարության մեջ՝ որպես պարտադիր տիրապետելիք:

Կարծում ենք՝ արդեն բավականին երկար կարդացիք։ Չհոգնեցնելու համար, հոդվածը բաժանել ենք երկու մասի։ Երկրորդ մասում կանդրադառնանք հետևյալ հարցերին՝ «Որո՞նք են Ձեր ուժեղ և թույլ կողմերը», «Ո՞րն է Ձեր ամենամեծ ձեռքբերումը», «Որտե՞ղ եք Ձեզ պատկերացնում 5 տարի հետո», «Ինչո՞ւ եք ցանկանում փոխել աշխատանքը կամ ինչո՞ւ եք դուրս եկել նախորդ աշխատանքից» և «Որքա՞ն աշխատավարձ եք ակնկալում ստանալ»:

One of the Magnus’ (HR and Recruiting agency) initiatives with an ambitious mission of making international HR practices reachable in Armenia.

One of the Magnus’ (HR and Recruiting agency) initiatives with an ambitious mission of making international HR practices reachable in Armenia.